ជាបឋម ខ្ញុំសូមសម្តែងនូវកិច្ចស្វាគមន៍យ៉ាងកក់ក្តៅចំពោះក្រុមហ៊ុន សហគ្រាស និង ឧស្សាហកម្មទាំងអស់ ក្នុងវិស័យសិប្បកម្ម កសិកម្ម និងសេវាកម្ម ដែលជាសមាជិកនៃសមាគមជីអេស១កម្ពុជា (GS1 Cambodia Association) នៃ សភាពាណិជ្ជកម្មកម្ពុជា។ ជាការពិតណាស់ ដើម្បីចូលរួមលើកកម្ពស់ការយល់ដឹងអំពីការប្រើប្រាស់ប្រព័ន្ធ ជីអេស១ (GS1) ឳ្យបានត្រឹមត្រូវ សមាគមជីអេស១កម្ពុជា (GS1 Cambodia Association) បានខិតខំប្រឹងប្រែងស្រាវជ្រាវ និងប្រមែប្រមូលរាល់ព័ត៌មានថ្មីៗ ទាំងក្នុងស្រុក និងក្រៅស្រុក ដើម្បីចងក្រងជាសៀវភៅមគ្គុទ្ទេសក៍ ស្តីពីការប្រើប្រាស់ប្រព័ន្ធ ជី អេស ១ (GS1) ឆ្នាំ ២០១៥-២០១៨។
សៀវភៅមគ្គុទ្ទេសក៍នេះ នឹងចូលរួមចំណែកផ្តល់នូវពុទ្ធិជាច្រើនដល់បណ្តាក្រុមហ៊ុន ដែលជាសមាជិក និងមិនមែនសមាជិកនៃសមាគមជីអេស១កម្ពុជា (GS1 Cambodia Association) ដែលក្នុងនោះរួមមាន ការយល់ដឹងអំពីការប្រើប្រាស់ និងអត្ថប្រយោជន៍នៃប្រព័ន្ធ អ៊ី ភី ស៊ី និងប្រព័ន្ធផ្សេងទៀត ប្រវត្តិនៃការកកើត សមាគមជីអេស១កម្ពុជា (GS1 Cambodia Association) ព្រមទាំងទិន្នន័យសំខាន់ៗជាច្រើនទៀត។
សៀវភៅមគ្គុទេសក៍ស្តីពីការប្រើប្រាស់ប្រព័ន្ធ ជី អេស ១ (GS1) ឆ្នាំ ២០១៥-២០១៨ នេះ គឺជាការ បោះពុម្ពផ្សាយលើកទីពីរ ដោយបន្ថែម និងបញ្ចូលព័ត៌មានថ្មីសំខាន់ៗជាច្រើន ដែលខ្ញុំជឿជាក់ថា ព័ត៌មានទាំងនេះ មានសារៈប្រយោជន៍ក្នុងការគ្រប់គ្រងសង្វាក់ផ្គត់ផ្គង់ និងការធ្វើពាណិជ្ជកម្មរបស់ក្រុមហ៊ុន សហគ្រាស និងឧស្សាហកម្ម ក្នុងវិស័យសិប្បកម្ម កសិកម្ម និងសេវាកម្មទាំងអស់នៅក្នុងព្រះរាជាណាចក្រកម្ពុជា។
ជាចុងក្រោយ ខ្ញុំសូមថ្លែងអំណរគុណដល់សមាជិកទាំងអស់នៃ សមាគមជីអេស១កម្ពុជា (GS1 Cambodia Association) ដែលតែងតែគាំទ្រដល់សកម្មភាពរបស់យើង និងសូមជូនពរលោកអ្នកជួបតែភាពជោគជ័យ និងវិបុលភាពក្នុងការប្រកបអាជីវកម្ម។
រាជធានីភ្នំពេញ ថ្ងៃទី ០៧ ខែ ឧសភា ឆ្នាំ ២០១៥
ប្រធានសភាពាណិជ្ជកម្មកម្ពុជា
អ្នកឧកញ៉ា គិត ម៉េង